Undas.

Nakikita natin sa balita na dumarami na muli ang mga tao sa sementeryo. Marmi ding umaalis papuntang probinsya upang bisitahin ang mga mahal sa buhay na yumao na at inilibing sa probinsya. Pero, inaalala ba natin talaga ang tunay na ibig sabihin ng Undas? Bakit kaya ang dami pa ring naiiwan na basura matapos ang Undas? Bakit maraming nagpupuslit ng alak sa sementeryo? Bakit ang dami-daming kung anu-anong bagay ang dinadala sa loob ng sementeryo? Hindi ba dapat ay ang dala lang natin ay kandila, bulaklak, rosaryo at siguro upuan at pagkain? Ang paggugunita ng Undas ay 'di nadadaan sa kung ano ang iskor mo sa pagkanta ng 'I Will Always Love You' sa Karaoke o sa pagkuwento ukol sa mga tsimis tungkol sa mga artista. Ang Undas ay ang pagbigay ng respeto sa ating mga yumaong mahal sa buhay. Simple lang ang pagbigay ng respeto. Katahimikan at dasal ay pawang sapat upang mabigyan sila ng respeto. Alalahanin natin na ang Undas ay panahon para sa patay. Hindi para mag-karaoke o mag-tsismis o mag-inuman.